GPS-koördinate: 30º07'11.89" S / 30º50'48.12" E

Net veertig kilometer suid van Durban lê ATKV-Natalia aan die suidkus met sy tropiese betowering en wag dat jy spore in sy silwerwit seesand kom trap en lyf in sy blinkblou, louwarm water kom natmaak. Hierdie oord is ’n ware paradys, waar die weer heeljaar soel en salig is.

ATKV-Natalia is net ’n klipgooi ver van allerhande opwindende en interessante besienswaardighede wat jou vakansie in ’n ontdekkingsavontuur kan omtower.

Die oord het sy eie winkel om in al jou behoeftes te voorsien. In die gesellige selfhelpwassery word die wasgoed in ligte luim kafgedraf. Daar is verskillende ruim en aangename selfsorgwoonstelle, asook Natalia se bekroonde woonwa- en kampeerfasiliteite. Die oord se vermaak is ’n besliste wenner oor naweke en vakansies.

 Terme en voorwaardes [kliek hier]